Playa del Carmen

Nachdem sich bis jetzt immer schoe mis Bruederli um di super Reise-Bricht kuemmeret haet, mues ich wohl au emol ad Reihe. Dass er noed di ganz Regezit im Internet mues verbringe...
Marco

Fuer huet haend mir ues noed vil vorgno. Nachdem mir mittlerwile doch super vil Kilometer unter d Raeder gno gha haend, isch eifach entspannig am Traumstrand vo Xpu-Ha ufem Programm gsi. Das heisst, es isch noed, sondern es waer...

Scho z Nacht haet sichs abzeichnet, dass mir de wohl schlechtischt Tag vo uesere Zit muend izieh huet. Es haet gregnet, was nur so haet abe moege. Au am Morge haets no noed wele ufhoere. Drum sind mir eifach im Zimmer lige blibe. Noed gad originell, aber was wotsch bi dem Rege am Strand...

Bis ues denn s Zimmermeitli use klopfet haet am 10i. Obwohl check-out erst am 12i gsi isch, haet si unbedingt wele s Zimmer mache, wo mir no dine gsi sind. Ja nu, haet sis halt gmacht, mir spoeter nomol duschet, jetzt macht sis halt no es zweits mol ;-)

Uf de Mittag sind mir denn uf s bekannte Playa del Carmen. Do isch doch nochli oepis los, haet no es paar Touriste und isch eigentlich no herzig. Uf all Faell wuer ich lieber do Strandferie mache als in Cancun! Und e langi Ladepassage haets au mit vil Souvenirs, halt au scho eher europaeischi Prise, wie mirs bis jetz no noed gwoehnt sind.

Wils immer no noed schoener worde isch, schribet mir jetz wacker is Internet und planet no echli vo uesere Reis in Florida ab em Mittwoch!

geschrieben von Marco Steiner um 23:16 2 Kommentare